ಮನೆ

ಭೂಮಿ ಮೇಲೆ ಅದೆಷ್ಟು
ಜಾತಿ ಮತ ಧರ್ಮಗಳ ಹಗೆತನ
ಕೊಲೆ ಭಯೋತ್ಪಾದನೆಗಳ ಅಟ್ಟಹಾಸ.
ಆಕಾಶ ಮಾರ್ಗ ಅದೆಷ್ಟು ಹೊಚ್ಚ ಹೊಸತನ
ಬಾನಂಗಳ ಅದೆಷ್ಟು ಸುಂದರ
ನನ್ನ ಕಿಡಕಿಯಾಚೆ ಅದೇನು ನಯನಮನೋಹರ
ಇಲ್ಲೊಂದು ಪುಟ್ಟ ಮನೆ ಕಟ್ಟುವಾಸೆ.
ಕಲ್ಲು ಮಣ್ಣಿನ ಇಟ್ಟಿಗೆ ಸಿಮೆಂಟಿನ
ಮನೆ ಬೇಡ-
ಅದಕೆ ಬಾಗಿಲು, ಕಿಟಕಿ, ಕೋಣೆ, ಬಾಲ್ಕನಿ ಎನುತ
ತಲೆ ಕೆಡಿಸಿಕೊಳ್ಳುವುದು ಬೇಡ
ಕಟ್ಟಿಗೆ ಹುಲ್ಲು ಹೊದಿಕೆಯ
ಗುಡಿಸಲವೂ ಬೇಡ-
ಭದ್ರತೆಗೆ ನಾಯಿ ನರಿ
ಆಳು ಕಾಳುಗಳೇನೂ ಬೇಡವೇಬೇಡ

ಇದ್ದೂ ಇಲ್ಲದಂತಿರುವ
ಇಲ್ಲದೆಯೂ ಇದ್ದಂತಿರುವ
ಶುದ್ಧ ಪರಿಶುದ್ಧ ಮೋಡಿನಾ ಹಂಜಿ ಹಿಂಜಿ
ನಿರ್ಭೀತಿಯ ಮನೆ ಕಟ್ಟಿ ಆಕಾಶದಲೆಗಳ ನಡುವೆ
ಗಾಳಿ ಬೆಳಕಿನಾ ಆಹಾರ ಸೇವಿಸುತಾ
ಕರಿಗಿಬಿಡಬೇಕೀ ಮನೆಯಲ್ಲೇ….
*****